«مراح» تطبيق تسجّل فيه حلالك ورعاتك ومصاريفك. هذي الصفحة توضح وش نحفظ، ووين ينحفظ، ومين يقدر يشوفه.
وش نحفظ
- حسابك: اسم المستخدم وكلمة المرور، أو إيميلك إذا دخلت بحساب Google. كلمة المرور تحفظها Google مشفّرة، وما يشوفها أحد.
- بيانات مراحك: اللي تكتبه أنت بس، مثل أعداد الحلال وأعمارها، والرعاة، والمواليد، والبيع، والنفوق والذبح، والمصاريف، والعلف، وموعد حول الزكاة، والإعدادات.
- إذا ربطت حساب Google: إيميل Google يحفظه Firebase عشان تقدر تدخل فيه لو نسيت كلمة المرور. ما نرسل له شي، وتقدر تفك الربط متى ما بغيت.
- إذا فعّلت التنبيهات: رمز لجهازك عشان يوصله التنبيه، ونوع الجهاز (آيفون أو أندرويد)، والتواريخ اللي ننبهك عليها: متى يخلص العلف، وعيد الأضحى، وحول الزكاة. توقفها من «المزيد ← التنبيهات» وينشال رمز جهازك.
- ملاحظاتك: إذا أرسلت لنا ملاحظة من زر الملاحظات، تنحفظ مع اسم حسابك ونوع جهازك عشان نرد عليك ونصلح اللي تقوله. ما يقراها إلا صاحب التطبيق.
- ملاحظات الأخطاء: إذا صار خطأ في التطبيق، تنحفظ ملاحظة تقنية قصيرة عشان نصلحه: نوع الخطأ، ونوع جهازك ومتصفحه، واسم مراحك. ما فيها شي من بيانات حلالك، وما يقراها إلا صاحب التطبيق، وتنمسح لحالها بعد 90 يوم.
وش ما نحفظ
ما نجمع موقعك، ولا جهات اتصالك، ولا صورك. وما فيه إعلانات ولا أدوات تتبّع، وما نبيع بياناتك.
وين تنحفظ
بياناتك محفوظة في Google Firebase، ومشفّرة وهي تنتقل بين جوالك والسيرفر. وفيه نسخة على جهازك عشان التطبيق يشتغل حتى لو ما فيه نت، والنسخة اللي على الجهاز تنمسح لما تسجّل خروج.
مين يشوفها
- أنت بس داخل التطبيق. كل مراح خاص بصاحبه، وما يقدر أي حساب ثاني يفتحه.
- صاحب التطبيق (بن ربيق) يقدر يوصل للبيانات تقنيًا من لوحة Firebase، وما يستخدمها إلا لمساعدتك إذا طلبت، مثل لو نسيت كلمة المرور.
- ما نبيع بياناتك، وما نشاركها مع أي أحد.
حذف حسابك وبياناتك
تقدر تحذف حسابك وكل بيانات مراحك نهائيًا وفي أي وقت من داخل التطبيق: المزيد ← حذف حسابي. وقبلها تقدر تنزّل نسخة احتياطية من المزيد ← نسخة احتياطية.
ولو ما تقدر تفتح التطبيق، راسلنا على app.meerah@gmail.com واكتب اسم المستخدم (أو إيميل Google اللي تدخل فيه) وإنك تبي تحذف حسابك، ونحذفه خلال 30 يوم ونرد عليك.
الحذف يشيل الحساب والمراح بكل اللي فيه على طول. اللي يبقى بس ملاحظات الأخطاء التقنية لو فيه، وتنمسح لحالها خلال 90 يوم.
لمين التطبيق
«مراح» لملاك الحلال ومن يشتغل معهم، ومو موجّه للأطفال.
لو تغيّرت السياسة
إذا عدّلنا هذي الصفحة، نحدّث التاريخ اللي فوق.
التواصل
لأي سؤال عن خصوصيتك أو بياناتك، تواصل مع صاحب التطبيق بن ربيق على app.meerah@gmail.com.